عفريت في مجلس الشعب

عفريت في مجلس الشعب
--------------------------------- الحلقه الاولي
سيسو عفريت من الجن متتخضوش
ده عفريت غلبان خالص من عفاريت الدرجه التانيه اللي هما بيخضوا بس
اه ااسف مانتوا برضو هتتخضوا
عموما انا عايز احكلكم حكايته من الاول خالص
سيسو بقي ياجماعه كان قاعد هو واصحابه العفاريت قعدة " أونس " وقاعدين يشربوا بنجر ....... يوووه .... كنت هانسي للي ميعرفش يعني ايه قاعدة اونس
اقوله.
الاول دي يعني قعدة مزاج والذي منه وطبعا يرجع تسميتها باونس بالنسبه للعفاريت انها تعود علي الانس يعني يقصدوا ان اللي غاويين مزاج هما البني ادمين بس
طبعا واحد من الناس اللي بتقرأ الحكاية هيقولي ايه يا عم لاكي لوك
انت هتضحك علينا ياعم فهمنا بس الاول ايه بيشربوا بنجر دي
اقوم اضحك في سري وأقوله ان عندنا هنا اللي بيعمل دماغ البنجو
العفاريت الكلام ده موش بينفع معاهم !!!!
اما البنجر عندهم اللي احنا بنعمله مخلل
هو احسن دماغ ليهم
وربنا يعفيكم
ولو حد هيزعل ربنا يبعدكم عن مباحث المخدرات
نرجع بقي لسيسو واصحابه العفاريت...
قاعد سيسو وماسك الكنشه في ايديه وبيشد وهو حاطط رجليه الاربعه علي مخده من الدخان ومريح في القاعده ..
" لوحد سال عن الكنشه موش هيحصل كويس ولو واحد حب يغيظني وقالي رجليه الاربعه ايه هاكسفه وقولوه ده عفريت انت شوفت عفريت قبل كده .,.. انا حر يا اخي انا اللي باكتب ""
قاعد سيسو بقي وماسك الكنشه وبيشد نفس منها وبيوزع علي اصحابه وفجأه احمر جسم سيسو اوي لدرجة ان العفاريت خافو منه
"العفاريت بيخافو من بعض زي ما احنا بنخاف من بعض عادي يعني "
عفريت من القاعدة : في ايه ياعم سيسو
سيـــــــٍسو : يا دي النيله يظهر الكلب ابن البني ادمين الشيخ سيد كرامه بيحضرني
عشان يأذي حد من مخاليق ربنا يا دي القرف
العـــفـــاريت : وبعدين ياعم سيسو نفض
سيـــســو : ياريت موش هينفع يا شباب ده المورد الرئيسي بتاع المعلوم "قاصده علي
البنجر" عموما باذنكم يا جدعان اشوف النيله ده عاوز مني ايه وراجعلكم
حد عاوز حاجه من تحت
العـــفـــاريت : شكرا يا باشا صاحب واجب يا باشا "تكرار كلمة باشا في العفاريت ملزم جدا
عشان كلمة باشا كلمة عفاريتي ومن المتعارف انها بتثبت التخين وطبعا كلنا
دلوقتي عرفنا ليه "
سيسو انتقل للعالم بتاعنا
طبعا عاوزين تعرفو مين سيد كرامه ده بقي موضوع سهل كلنا اكيد بنقابله
سيد الحلاق اقصد سيد كرامه واحد من الناس اللي بيتصلو بالعفاريت عشان اللي يدفع اكتر
ويخلص مصلحته بشغل العفاريت موش محتاج اقولكم واحد زي ده اخلاقه ايه انتو هتعرفوا لوحديكم من طريقه كلامه مع سيسو دلوقتي
سيسو : ايه ياعم سيد هو انت موراكش غيري ولا ايه
سيد كرامه : ايه يا سيسو انت موش يتمر فيك انا موش لسه مضبطك باتنين كيلو بنجر
سيسو : انت هتسيحلي ياعم مخلاص خلصو هيه حدوته
سيد كرامه : يعني موش عاجبك موش انت كمان خلتني وصلتهوملك عندكم بنفسي
سيسو : يا سلام احنا موش اتفقنا تسلمهوملي CIF انت هتحمرق ولا ايه
سيد كرامه : خلاص المهم انا عاوزك في سبوبه حلوه
سيسو : ياعم حرام عليك بقي ارحم بقي الناس ده انت هتسبب في حرقي ر بنا يستر
سيد كرامه : ياعم دي سبوبه فيها ولاعشرين كيلو بنجر
سيسو : وهو بيفكر "وانتم عارفين الكيف بيـذل " طببب قووول بسسسرعه
سيد كرامه : اهدا ده موش خضه ولا فك رصد بتاع فراعين دي شغلانه نظيفه ومفهاش لبش
سيسو : قلقان وهو بيقول نظيفه ازااااي يعني
سيد كرامه : يعني هما شوية ورق هتروح تعرف فيهم ايه وترجع تقولهوملي بس كده
سيسو : يااااه بس وعشرين كيلو بنجر لا ياعم ده كلام فاضي قول ياعم خليني اخلصه
واطلع بسرعه اكمل القاعده بتاعتي مع صحابي
سيد كرامه : طيب طيب ... اصبر بس لما اقولك هتروح فين بالضبط
سيسو : فين يعني "باستهتار "
سيد كرامه : عادي انت هتروح بس مقر مجلس الشعب في جلسه الساعه 5 النهارده وهتدور علي واحد اسمه عايش الاسيوطي وهتشوف في ايه في الورق بتاعه اللي في الشنطه وتيجي تقولي بس كده
سيسو اتخض قوي لدرجة ان سيد كرامه استغرب جدا وكان هيتجنن ويعرف ليه
سيد كرامه : ايه ياعم العفريت الجامد مالك لونك اتغير ليه وقلب علي دخاني مانت كنت كويس ومحمر واخر حلاوه
سيسو : بص ياعم سيد كله كوم وادخل الحكومه بتاعتكم العب مع حد جوه كوم انت موش فاهم حاجه
سيد كرامه : ازاي يعني
سيسو : ياعم اسكت ربنا يهديك انت هتورطني كده انا موش عايز اتكلم .... سكت شويه ....
بص ياعم ... من الاخر ... الكبير بتاعنا مربط مع الكبير بتاعنا وبينهم اتفاق والكبير بتاعنا بيخاف موت من كبيركم ولو حد عرف حاجه هيعلقوني في العروسه وموش بعيد اتحرق بمحاكمه عفاريتي من الدرجه الاولي ... انت يرضيك كده يعني
سيد كرامه : انشاله يارب اولع بجاز بايظ لو كنت فاهم حاجه
طبعا واحد هنا هايسيب كل الموضوع ويفتكر كلمة هيعلقلي العروسه .
ويسالني يقولي يا لاكي ايه العروسه دي وازاي بيعلقوا الغلبانه دي للناس ؟؟
اقوم اقوله بقي
تاريخيا العروسه هيه اداة تعذيب من العصر الفاطمي متأصله بمواقع تاريخيه بمصر
منها قسم الخليفه اسف اقصد منطقة الخليفه والقلعه
جنب المناطق التاريخيه اللي هناك وهي تستخدم في تعليق الزبون من رجليه وربط يديه بشكل شاعري لضربه بكل الادوات المتاحه مع التركيز علي الافا ومنطقة الالم المتوسطه "الحدق يفهم" مما يؤدي الي تسهيل عمل الادارت التنفيذيه ووابل من الاعترافات المنصهره من فم الزبون ... وتم توريدها الي العفاريت باتفاقيه شنننيف مع التحفظ علي سر اختراعها من الانتشار للمنع من محاوله اختراع مضاد لاستخدمها .
سيســو : بص يا عم سيد انا موش هاقدر اعمل كده
سيد كرامه : ياعم انت خايف ليه كده اشحال لو مكنتش عفريت دانت طلعت عفريت سكه صحيح
سيسو : ياعم سيد انا عايش بقالي 261 سنه بكرامتي خليني اربي عيالي ال52 في امان
سيد كرامه : خلاص ياعم خليهم 60 كيلو بنجر
سيسو : اصل الموضوع موش موضوع بنجر
سيد كرامه : ياسيدي 100 كيلو بنجر
سيسو : "طبعا بيفكر وزي مقولنا من شويتين الكيف بيذل " خلاص بس اوعي حد يشم خبر
سيد كرامه : اتفقنا
سيسو : اتفقنا انا هاروح المشوار ده وربنا يستر
خرج سيسو من عند سيد كرامه وهو بيفكر هيعمل ايه طبعا موش في 100 كيلو البنجر بيفكر هايروح هناك ولو حد مسكه المهم وهو طاير في الهوا ..... اه طاير ... انتم نسيتوا ده عفريت ... بص في ساعته لاقاها 5 قايم خد بعض وراح علي مجلس الشعب عشان يعمل المهمه اللي سيد كرامه كلفه بيها .
دخل سيسو المجلس وسامع واحد بيزعق وقاعد يقول في الميكرفون
يا جماعه لو حد جابلي دليل واحد ان ابن اختي أ خد قرض من البنك او زور الشهادة بتاعت البكالوريوس انا بنفسي هطالب انه يتحبس ....
سيسو سمع الكلام وضحك اوي
لدرجة انه كان هيغمي عليه خصوصا لما افتكر الراجل ده
وهو بيتحايل علي سيد كرامه عشان سيسو يعمل شهادة ابن اخته ويظبطه عند مدير البنك.
وقعد يضحك يضحك بصوت عالي

وفجأه المجلس كله سكت وبص علي سيسو وعنيهم بتطق شرار
ينهار اسود دول شفوووه مع انه عفريت وموش اي حد يشوفو غير لما هو يعوز كده
سيسو كان هيموت من الخوف وهو شايف انهم شايفينه وقعد يفكر ياتري العروسه هتوجعه اوي ولا لو حرقوه يبقي احسن ..... الي الحلقه القادمه لاكي لوك