يوميات شاب عاطل 1

بداية الحلقة

الساعة دلوقتي الساعة 3 العصر وصاحبنا لسة بيفرك عينيه
ولسة قايم من النوم أصله كان ياعيني طول الليل سهران في الكافيه الفلاني
اللي في المهندسين
المهم صاحبنا ده بما أنه من مواليد عصر التكنولوجيا الحديثة فلازم يبقي
إبن العصر ده ويستعمل الموبايل والاب توب وصاحبنا ده قبل ما يقوم من سريره
ويغسل وشه او حتي يمسح العماصة من عينيه قعد يدور علي الموبايل ولما مسك
الموبايل وبص فيه ظهر الذهول علي وشه وقال " لااااااااااا مش معقول مفيش
ولا رنة ولا حتي رسالة من ساعة مانمت لحد دلوقتي "
( أصل يعني الدنيا هتقف لو هو نام .... ما علينا)
فقام صاحبنا ده رمي الموبايل بعصبية وقام فاتح الاب توب علشان يشوف مين من
أصحابه عالنت فلقي الناس كلها أوف لاين فقفل الاب توب وقام رايح للتليفون
علشان يكلم أي حد من أصحابه علشان يخرجوا ويتفسحوا فراح قعد شوية جنب
التليفون وقعد يفكر ويقول لنفسه أكلم مين أكلم مين ......

خلاص أكلم أحمد

أتصل بأحمد موبايله مقفول فقال خلاص أكلمه في البيت أتصل في البيت وجري الحوار التالي
( علي فكرة نسيت أقول لكم أن صاحبنا العاطل ده أسمه تامر )

التليفون رن ثم ردت مامة أحمد فقال لها تامر

تامر: مساء الخير..أزيك يا طنط
طنط: أيه ده تامر فينك بقالك فترة مبتكلمش أحمد
تامر : معلش يا طنط الدنيا تلاهي
تامر: هو أحمد فين يا طنط بتصل بيه علي الموبايل موبايله مقفول
طنط : ده أحمد لسة مرجعش
تامر : مرجعش منين ( الندل راح يتفسح من غيري ..."ده تامر بيكلم نفسه")
طنط : ده أحمد لسة مرجعش من الشغل
تامر(بإستغراب) : وهو أحمد بيشتغل
طنط : ايوة ده بقاله كذا شهر
تامر : طيب كويس
تامر : طيب سلام دلوقتي ياطنط ولما أحمد يوصل البيت قولي له أني أتصلت بيه
طنط : حاضر يا تامر
تامر : سلام
طنط : سلام

قعد يفكر تامر ويقول لنفسه كده الخروجة باظت طيب هخرج مع مين وقعد يفكر
طيب خلاص اخرج مع محمد وأتصل بمحمد وحصل نفس السيناريو وأتصل بفريد ووليد
ومدحت وسامي نفس القصة

تامر أتعصب قوي وقال خلاص يغور كل العيال دي أنا هكلم أي واحدة من البنات وهي هتنزل معايا علي طول

وفعلا قعد تامر يدور في الموبايل بتاعه علي نمر البنات طلع له أول أسم
أميرة فقال لا البت دي خنيقة دور شوية تاني طلعت له بسمة فقال لا دي عايشة
فيها دور الأميرة ديانة فقال طيب أجرب أجرب أكلم نهي وحصل الحوار الأتي

تامر : هاي نهي عاملة أيه
نهي : تاااااااااااااامر فينك ياعم
تامر : مشغول يا بنتي علي طول
نهي : ماشي ياعم المشغول
تامر: المهم كنت عايزك في موضوع مهم
نهي : خير يا تري
تامر : كنا عايزين نخرج خروجة جامدة
نهي : أسفة يا تامر مشغولة والله جدا
تامر : يعني هيكون وراكي أيه
نهي : ورايا شغل كتير جدا اصل أنا بشتغل مع بابي في الشركة
تامر : طيب خلاص هكلمك في وقت تاني ... سلام

وقام قافل تامر التليفون وهو مخنوق قوي وقعد يفكر وقال لنفسه الظاهر ان
الموضة اليومين دول الشغل وأنا من بكرة هروح أشتغل بس هشتغل ايه....
مش مهم هشتغل أيه المهم أبقي ماشي مع الموضة وأهم حاجة أني أصحي بكرة بدري علشان أروح الشغل

الحلقة الثانية

قرر تامر أنه يصحي تاني يوم بدري علشان يروح يشتغل بس ظهرت
مشكلة كبيرة أزاي هيصحي بدري وهو أساسا بينام الصبح قعد تامر يفكر كتير
وبما أن تامر صاحب حلول عبقرية فلقي فكرة جامدة جدا وهي أنه يفضل صاحي لحد
تاني يوم ويروح الشغل من غير نوم

(علي فكرة تامر لحد دلوقتي مدورش علي شغل والله أعلم شغل ايه اللي هيروحه بكرة بس خلينا معاها لحد مانشوف دماغه هتوديه لحد فين)

المهم تامر بيبص في الساعة علشان يعرف فاضل أد أيه علي بكرة الصبح لقي
الساعة لسة 6 مساءا قعد يفكر" طيب أنا أشغل نفسي في أيه لحد الصبح ده أنا
لسة صاحي من النوم مبقاليش ساعتين اتصلت بكل الناس كل واحد منهم عامل فيها
عبدو المشغول وحتي البنات كمان مشغولين مش مهم أنا هعرف أظبط نفسي واشغل
نفسي في حاجة لحد الصبح "

ولسة تامر غرقان وسط افكاره حتي ظهر صوت مزعج بينادي بصوت عالي بيقول له

تااااااااااااااااااااااااااااااامر

الصوت المزعج ده صوت أخته ندي

((ندي دي اخت تامر الأصغر منه لسة طالبة في الجامعة وتامر يعتبر أرق منها
لأن ندي دي بتلعب كاراتيه وعايشة دور جيت لي علي جاكي شان علي بروس لي
وأسلوبها في الكلام جامد وبتكلم بطريقة بيئة جدا بس شكلها زي القمر ))

ودار الحوار الأتي بين ندي وتامر

ندي : تاااااااااااامر
ندي: تااااااااااااامر
تامر: فيه ايه مالك قاعدة بتزعقي ليه
ندي : بقالي ساعة بنده عليك وأنت مبتردش عليه
ندي : شكلك ياض يا تامر سرحان في البت بتاعتك
تامر: يا بنتي أتكلمي معايا بأدب ده أنا أخوكي الكبير
ندي : بطل الحوارات الفاشلة اللي انت بتكلم فيها دي وقول لي أنت سرحان في أيه
ندي : هي البت بتاعتك نفضت لك
تامر: محدش يقدر ينفض لي
تامر : ده أنا كنت بفكر في موضوع مهم
ندي : هههههههههههههههههههههههههههه
ندي : تامر بيفكر ......وكمان في موضوع مهم.....ههههههه
تامر : بطلي هزار أنا بجد بفكر في موضوع مهم
ندي : خلاص قول ياعم أيه الموضوع المهم وأنا ممكن أساعدك
ندي: يوضع سره في أضعف خلقه
تامر: أنا قررت أصحي بدري علشان أروح الشغل
ندي:هههههههههههههههههههههههههههههه
ندي : تصحي بدري وتروح الشغل ....وسيادتك أشتغلت أيه
تامر : ملكيش دعوة
تامر : المهم أني أصحي بدري
تامر : أنا فكرت أني أفضل صاحي لحد بكرة من غير نوم وبعدين أروح الشغل
ندي : ( بتتكلم بصوت منخفض فكرة معوقة زي كل أفكارك )
تامر : بتقولي حاجة
ندي: لا بقول ربنا معاك
تامر : بس مش لا قي حاجة أعملها لحد بكرة الصبح أنت أيه رايك
ندي : خلاص ياعم أنا عندي شوية حاجات تشغلك
تامر : طيب كويس
ندي : بص أنا لسة راجعة من الجامعة هروح أخد شاور وأجيلك ننزل مع بعض ومع
شوية بنات أصحابي نعمل شوبنج وانت تيجي معانا علشان تسوق العربية علشان
هلكانة طول النهار ومش هقدر أسوق وبعدين ألف علي المحلات
تامر : يعني كنت السواق الخصوصي بتاع سيادتك
ندي : ياعم ولا سواق ولا حاجة أنا بشغلك بشوية حاجات أنت مش عايز تفضل سهران لحد الصبح خليك ورايا وأنت تكسب
تامر : ماشي
ندي : بالمناسبة خلي بالك ياض يا تامر أنا عارفة أنك عينيك زايغة لو ضايقت واحدة من صحباتي هحط صبع رجلي الصغير في عينك علشان تتعدل
تامر : بطلي الهبل اللي أنت بتقوليه ده
تامر : هننزل الساعة كام
ندي : عالساعة 8
تامر : اوكي
ندي : أحبك لما تسمع الكلام
تامر : ممكن أطلب منك طلب
ندي : أتفضل ياراجل ده أحنا أخوات
تامر : أرجوكي أتكلمي بطريقة أحسن من كده وبلاش الطريقة البيئة اللي أنت بتكلمي بيها
ندي : أنت بتحلم يا زعيم

وراحت ندي تاخذ الشاور بتاعها وراحت تجهز نفسها وفي الفترة دي راح تامر يتفرج شوية علي MBC 2

الساعة جت 8 وندي جهزت وكمان صحباتها جائوا فندي قالت لهم سيبوا العربيات
بتاعتكم وهننزل بعربيتي وتامر هو اللي هيسوق فقالوا مش مشكلة
بالمناسبة اللي جم دول كانوا بنتين والبنتين دول كانوا صواريخ
المهم تامر باشا أول ما شافهم تنح وندي لاقيت كده قالت له شكلي كده هرجعك البيت ياض يا تامر
تامر رد عليها وقال لها لا خلاص أنا هتعدل فقالت له ندي ايوة كده ناس مبتجيش غير بالعين الحمرا
وفعلا راحوا يعملوا شوبنج وتامر باشا معاهم والبنات قعدوا يلفوا علي
المحلات تامر في الأول كان مبسوط علشان الصاروخين اللي معاه لكن بعد كتر
اللف علي المحلات كره اليوم اللي أتولد فيه من كتر المشي

وقعد تامر يقول لنفسه " أنا أيه اللي كان خلاني أتهور وأوافق علي كلام ندي
ده اللي يمشي ورا نصيحة بنت يضيع ده لو النصيحة صح تأخر الواحد 10 سنيين
ولو غلط تأخر الواحد العمر كله " يوميات شاب عاطل 1 31

وتامر لسة قاعد بيكلم نفسه طلعت ندي من تحت الأرض ودار بينهم هذا الحوار

ندي : تامر أنا تعبت من كتر المشي واللف في المحلات
تامر : خلاص يلا نروح
ندي : نروح مين ياراجل الدنيا لسة بدري انت مش عايز تفضل صاحي لحد الصبح
تامر : أيوة
ندي : خلاص يبقي خليك ماشي ورايا
تامر : ( تامر بيكلم نفسه... شكلك والله هتضيعيني)
تامر : طيب هنعمل أيه دلوقتي
ندي : هندخل سينما
تامر : دلوقتي دي الساعة 12 بالليل
ندي : ايه المشكلة ياعم السينما اللي في المول ده فيها حفلة بتبدأ الساعة 12 ونص
تامر : بس الوقت متأخر عليكي أنت وصحباتك
ندي : وأنت مش راجل معانا أبقي خلي بالك مننا
ندي : وخلي بالك أحنا أساسا مش محتاجين حد يخلي باله مننا أنا أقدر أطحن أتخن تخين أنا بس عايزة اساعدك أنك تضيع شوية وقت لحد الصبح
تامر : (تامر بيكلم نفسه تاني ... ربنا هو المنتقم )
ندي : وخلي بالك بعد ما الفيلم يخلص...
تامر(قاطعها في الكلام) : هنروح فين تاني بعد ما الفيلم يخلص حرام عليكي أنا كده هبقي خلاص هلكت
ندي( بتتكلم وهي بتضحك) : متخفش مش هنروح حتة تاني غير أن احنا هنوصل
البنات لحد بيوتهم ويبقوا يجوا يأخدوا عربياتهم من عندنا في أي وقت
ندي : وكمان ياعم توصيلك للبنات كمان هتبقي حتة رجولة منك
تامر : حرام عليكي مش قلت لك بطلي طريقة الكلام دي
ندي : وأنا قلت لك انت بتحلم

المهم راحوا دخلوا السينما وخلصوا السينما علي الساعة 3 ونص وعلي ما تامر وصل البنتين وبعدين روح هو وندي كانت الساعة جت 4 ونص

ولما وصل تامر وندي للبيت دار بينهم الحوار الأتي

ندي : تامر أنت ناوي تنزل الشغل علي الساعة كام
تامر : الساعة 8 ونص
ندي : يعني فاضل حوالي 4 ساعات
تامر : ايوة
ندي : طيب أحنا نقعد نتعشي وبعدين ربنا يفرجها

وقعد تامر وندي يتعشوامع بعض وبعد العشا قعدت ندي ترخم علي تامر لحد ما الساعة جت 6 الصبح فقالت ندي لتامر الأتي

ندي : بص يا مان أنا كده جبت أخري ومش قادرة أسهر أكتر من كده أناعملت اللي عليها و زيادة
ندي : أنا خلاص هدخل أنام
تامر : أنت مش هتفضلي صاحية معايا وتنزلي علي طول علي الكلية
ندي : لا طبعا يا زعيم هو أنا لو كان عندي كلية كنت سهرت لحد الوقت ده أنا عندي أجازة بكرة قصدي النهاردة ماهي الشمس خلاص طلعت
تامر : طيب بما أنك أجازة خليكي قاعدة معايا
ندي : والله تعبانة جدا جدا
تامر : ما أنا كمان هلكان
ندي : بس أنا عندي أجازة وأنت وراك شغل .... سلام

وسابت ندي تامر وراحت تنام وراح تامر علي الاب توب يشوف فيه اي حد من
اصحابه أون لاين ولا كله أوف لاين ولاقي كل الناس أوف لاين فقام قافل
الجهاز وبص في الساعة لاقاها 6 ونص قال لنفسه خلاص قربت كلها ساعتين
وراح جري تامر علي قناته المفضلة MBC action علشان يشوف فيلم أكشن يخليه
يصحح وفضل تامر يتفرج علي التلفزيون لحد الساعة ما جت 7 ونص لما جت الساعة
7 ونص حصل ما لم يتوقعه تامر...............

\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\ \\\\\\\\\\

الحلقة الثالثة

خلصت الحلقة اللي فاتت علي أن خلاص الساعة جت 7 ونص وحصلت
مفاجأة لم يتوقعهاتامر وهي أنه راحت عليه نومة من كتر التعب والسهر وعدت
ساعات كتير وتامر باشا نايم لحد ما صحي علي صوت ندي وهي بتصحيه عالساعة 3
ونص وحصل بينهم الحوار الأتي
ندي : تامر تامر تامر تامر
ندي : تاااااااااااااااااااااااااااااااامر
ندي : أصحي يا تااااااااااااااااااااااامر
تامر : أيه ده فيه أيه
تامر : أيه الدوشة اللي أنت عاملاها دي
ندي : أنت ياعم مش كنت ناوي تروح الشغل النهاردة
ندي: ههههههههههههههههههههههههههههههههههههههه يوميات شاب عاطل 1 9

تامر : هي الساعة كام دلوقتي ؟
ندي : الساعة 3 ونص يا جميل
تامر : حرام عليكي ليه سبتيني نايم لحد دلوقتي
ندي : سبتك أيه
ندي : هو أنا أتفقت معاك أني أصحيك أنت مش كنت هتسهر لحد الصبح وتروح الشغل من غير نوم
تامر : بس أنت السبب أن تروح عليه نومة
ندي : أزاي يعني ياعم
تامر : أنت اللي أخذتيني معاكي في مشاوير وتعبتيني وخلتيني هلكان
ندي : بص ياعم طقم الشماعات اللي أنت جايبه جديد ده أركنه علي جنب
تامر : شماعات أيه مش فاهم
ندي : يعني أنت بتدور علي أي شماعة تعلق عليها أخطائك
تامر : بصي بقي أنت مينفعش أي حوار معاكي أنا هسيبك وادخل أقعد مع نفسي في أوضتي ومش عايز أشوف وشك ولا أسمع صوتك

وفعلا تامر ساب ندي ودخل أوضته ونام علي السرير وقعد يفكر وندي سابته شوية
وبعدين راحت له الأوضة خبطت علي الباب ولم يرد قامت فاتحة الباب وداخلة
بدون أذن ولما تامر شافها داخلة عمل كأنه مش شايفها
(( قال أيه زعلان ))
المهم جري الحوار الأتي بينهم
تامر : مالك ياعم ضارب سقف
(( ضارب سقف يعني الواحد من دول تلاقيه لما يكون مكتئب أو محبط يدخل أوضته وينام علي سريره ويفضل متنح للسقف))
تامر : ( تامر عامل نفسه مش سامع )
ندي : رد ياض بدل ما أوريك شغلك
ندي : هديك علقة تحلف بيها طول عمرك
تامر ( بيتكلم بغضب وعصبية) : أطلعي برة بدل ما أوريكي شغلك أنت نسيتي أن
أنا كنت بلعب <أيكيدو> يعني لو أنت قعدتي تدربي الكاراتيه بتاعك ده
طول عمرك مش هتعرفي تعملي معايا حاجة ولا أنت ولا حتي المدرب بتاعك
ندي : خلاص ياعم هدي نفسك
ندي : أنت متضايق ليه
ندي: أوعي تكون متضايق علشان حوار أنك مقدرتش تصحي بدري وتروح الشغل
تامر : وليه ما أتضايقش
ندي : علشان لوكنت فضلت صاحي مكنتش حتي هتقدر تروح أي شغل
تامر : ليه يعني
ندي : أنا مش كنت قلت لك أمبارح أن النهاردة عندي أجازة من الكلية
تامر : ايوة ... وأيه المشكلة لما يكون النهاردة أجازة
ندي : أنت متعرفش ليه النهاردة أجازة
تامر : هي الأجازة لازم يكون ليها سبب
ندي ( بتكلم نفسها) : الواد تامر ده باين عليه غبي أوي
ندي : طيب شكل كده دماغك في الباي باي أنا هقول لك واحدة واحدة يمكن تحصل المعجزة وتفهم
تامر : بطلي قلة أدب وكلميني بأحترام شوية
ندي : طيب أنا هسألك كام سؤال ومنهم هتعرف ليه النهاردة أجازة ؟
تامر : قولي .... مع أني مش حمل فوازيرك
ندي : السؤال الأول ....... بابا وماما فين ؟
تامر : مسافرين
تامر : وده أيه علاقته بالأجازة
ندي : بطل دوشة خليك معايا للأخر
ندي : السؤال الثاني ...... مسافرين فين وبيعملوا أيه ؟
تامر : مسافرين السعودية .......... راحوا يحجوا
ندي : الحمد لله وصلنا طيب النهاردة أجازة بقي علشان النهاردة الوقفة ( وقفة عرفات )
ندي : يعني النهاردة أجازة رسمية يعني كل المصالح الحكومية والخاصة أجازة
تامر : ههههههههههههههههههههههههههههههههههههه
تامر : طيب مقلتيش ليه كده من بدري
ندي : رخاااااااااااامة
ندي : ههههههههههههههههههههههههههههههه
ندي : روق بقي علشان نتفرج سوا علي الماتش الساعة 8
تامر : ماتش أيه؟
ندي : ماتش الزمالك والأهلي
تامر : هو الماتش النهاردة ؟
ندي : أيوة

(( خلوا بالكم تامر أهلاوي وندي زملكاوية ))

تامر : طبعا أحنا اللي هنكسب كالعادة
ندي : أنت بتحلم ده فريقكم ده فريق العواجيز
تامر: هههههههههههههههه ..... عواجيز طيب أصل ذاكرتي ضعيفة شوية ممكن تقوليلي مين ياتري الفريق اللي أخد 6 رايح وخد 4 جاي
ندي : ده كان زمان
ندي : بص بقي ولو هنتكلم في الملفات القديمة الزمالك غلب الأهلي في الستينات 6 - صفر
تامر : هههههههههههههههههههههههههه
تامر : كل دي أشاعات يعني سيادتك كنتي شفتي الماتش بتاع الستينات علشان تتكلمي
تامر : بالمناسبة مدحت شلبي هيعلق علي الماتش علي قناة أيه أصل أنا بحب تعليقه من ساعة بيبو وبشير بيبو والجون
تامر : ههههههههههههههههههههههههههه
ندي : ماشي ياعم
ندي : مدحت شلبي هيعلق علي الماتش في قناة مودرن سبورت
تامر : المهم عايزن نأكل أي حاجة قبل الماتش ما يبدأ
ندي : أوك
ندي : عندك التليفون أطلب اللي أنت عايزه
تامر : ماشي
وفعلا تامر طلب الأكل دليفري وقعد يأكل هو وندي
وهما قاعدين يأكلوا جري الحوار الأتي
ندي : علي فكرة يا تامر ليلي أتصلت وبتسلم عليك وبتقول أنها جاية بكرة هي وجوزها و أبنها

(( ليلي دي أخت تامر وندي وهي أكبر من ندي ولكن أصغر من تامر وزوجها رجل أعمال شاب وعندهم ولدأسمه عمر عنده 3 سنين بس زي العسل ))

تامر : طيب كويس علشان هي وحشاني قوي
ندي : يلا ياعم خلص أكل بسرعة علشان فاضل أقل من نص ساعة علي الماتش
تامر : اوك

وفعلا خلصوا أكل وقعدوا قدام التلفزيون في أنتظار الماتش والساعة دلوقتي بقيت الساعة 8 والماتش هيبدأ...........

\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\ \\\\\\\\\\\\\\

بجد الله ينور

القصة جميلة مشكور

متميز من يومك

» ( يوميات صرصــــور)
» ..:: يوميات واحد متقمص ::..
» يوميات اتنين مخطوبين
» يوميات ستار اكاديمى اليوم التانى
» يوميات ستار اكاديمى اليوم الثالث