داخل الغرفة الملكية
شوشو....شوشو ......ما تصحى بأه الله"
- هى الساعه كام؟
- تمانيه
- بذمتك حد يصحى حد الساعه تمانيه؟ .....سيبينى نايم شويه
- لا بأه مانتاش نايم .......قوم شوف شعبك يا أخى الناس بتموت من الجوع بره
- يا ستى ما يخفوا شويه من على دماغى هو مش فيه ازمة اسكان؟
- اه
- اهم بيحلوها من نفسهم بدل ما نوجع دماغنا ونبنى تانى ............ وبعدين انتى لسه عايشه؟
- لا ميته يا خفيف
- يادى طولة اللسان اللى انتى فيها
- يعنى هجيبه من بره منا مراتك
- هو انا مموتكيش ليه؟...............يا مسرور
- مش هنا
- ده راح فين ده ؟
- راح يمضى وجاى
- يمضى فين؟
- اصله بيشتغل فى وزارة الزراعه بيمضى وييجى اوام
- ومين اذنله بكده؟
- يا عم ده هو على كده بقاله عشر سنين وانت مش بتصحى قبل 12 سيبه يلقط رزقه شويه
- الله الله وشويه الاقى ابوكى بيسرح بمناديل ورق فى الاوتوبيسات كمان
- وبعدين ..........مش عاوزين طولة لسان احسن والله منا مكمله الحدوتة بتاعة مرزوق والسلطانيه
- يلا مش مشكله هسيب مسرور يلقط رزقه اكمن هو مقموص
- مقموص من ايه باه؟
- عاوز يرمى السيف اللى معاه
- امال يطير الرقاب ازاى؟
- عاوزنى اجيبله مدفع رشاش
- طب هتسمع بقيت الحدوته ولا هتنام تانى؟
- لا خلاص ............... هقوم افطر واشربلى حجرين عالقهوه تحت واطلع نكملها
وبعد فترة
- وقفنا فين؟
- انا فاكر ......احكى من الاول
- نعم هو انت متجوز راديو؟ افتكر
- مش فاكر
- طب والله اما افتكرت منا حاكيه
- اه عند لما نزل للملك تحت
- اشطه عليك
- شفتى انا فاكر ازاى
- اه عقلك سابق سنك بكتير ............ المهم مراته كانت عماله تدور عليه فى الشوارع وتقول.....
- يا ترى انت فين يا مرزوق
- الله انت عارفها؟
- لا بس سمعت البق ده كتير اوى ............... كملى كملى
- المهم نزل للملك والعساكر اللى جايبينه قالوا جاسوس يا مولاى ....... الملك باه كان عنده مشكله
- اه اكيد اتجوز واحده قارفاه
- لا يا روش ده مشكلته انه مكنش لاقى تاج يعجبه فلما شاف السلطانيه فى ايد
مرزوق قاله هات التاج اللى معاك ده كده انت جايبهولى هديه؟
............مرزوق قاله اه يا مولاى .......بس يا سيدى وقام الملك امر
انهم يدوله كنوز كتير وهدايا من عندهم ويوصلوه بيته
- خلصت كده؟ اما حكايه تافهه اوى يا ريتنى كنت موتك امبارح وخلصت
- لا استنى لسه
- على عمو؟ انت لقيتينى هموتك قمتى قلتى أألف اى حاجه واهو ملك اهبل
- لا والله كلامك كله سليم بس انا مش بألف حاجه
- طب كملى اما نشوف كده
- بس يا سيدى قام مرزوق راح البيت وقعد يحكى لمراته على كل اللى حصل لكن
كان فيه جار لمرزوق سمع الحكايه كلها وراح جاب هدايا كتير وراح نفس المكان
ونزل الميه والعساكر طبعا شافوه ومسابوهوش وودوه للملك
..................ودوه لمين؟
- للملك
- شاطر .......... الملك اخد منه الهدايا وكل حاجه وقاله معلش احنا ادينا
كل حاجه عندنا لمرزوق ومش هنقدر نديلك اى حاجه تانيه بس هنديلك اغلى حاجه
عندنا............ تاج الجزيره قام جار مرزوق لما شافها قال...........
- السلطانيه
- الله انت عارفها؟
- لا البق ده بسمعه كتير برده
- يلا ربنا يوفقك.............. انا خلصت كده
- وحكايه تتحكى فى دقيقه قعدتى تحكى فيها تلات ساعات ............... يلا اتشهدى على روحك......يا مسرور
- افندم يا سعادة الباشا السلطان
- طير رقبتها
- مش هينفع سعادتك
- ليه باه ياد انت؟
- الخزنه قفلت الساعه 12 واحنا بندفع على الراس خمسين قرش دمغه
- يووووووووووووووه طب مفكرتنيش ليه ياد انت؟
- مانت كنت مندمج فى الحدوته
- طب غور انت وابقى فكرنى اخليك تطير رقبة نفسك بكره
- امرك يا سعادة الباشا السلطان
- حظك انكتبلك عمر جديد
- وانت كمان انكتبلك حدوته جديده
- طب قولى
- لا بالليل باه عاوزه اروح لبابا................سلام
وفي قصر الوزير
- شاهى حبيبة قلبى .......... انا كنت هموت من الفرحه لما اديتينى رنه الصبح
- معلش باه يا بابا معرفتش اتصل شهريار شال المباشر
- المهم انى اطمنت عليكى............ ايه الاخبار؟
- تمام انا وراه مش هخليه يموتنى وبس لا ........اما خليته ينتحر
- طالعه لابوكى
- انا هروح باه عشان متأخرش
- طب خدى دول هاتيلك حاجه حلوه
- يا بابا انا كبرت باه على الحاجات دى
- خلاص هاتيهم انا غلطان
- انت ما صدقت هاتهم اشرب بيبس
وفي المساء
- احكى باه واحده جديده بس خلصيها عشان اعرف اموتك الصبح
- ماشى يا عم كله من ذوقك ........... عارف الحدوته بتاعة على بابا؟
- حافظها صم
- طب عارف الحدوته بتاعة الـ....
- اه
- انا لسه قلت حاجه؟
- منا عارفهم كلهم
- طب عارف الحدوته بتاعة الحمار اللى قال لأ؟
- لأ...................... وربنا لاموتك احكى اى زفت وخلاص
- طب اسمع يا سيدى ......... بيقولك كان ياما كان يا ساده يا كرام ولا يحلى الكلام الا بذكر النبى عليه الصلاة والسلام
- ................................
- قول عليه الصلاة والسلام لحسن تلاقى القلم نازل مطير عينك المره الجايه
- عليه الصلاة والسلام .................. ايه يا بت هو انتى من المدبح ولا ايه؟ كملى من غير قلة ادب
- حاضر .........بيقولك ......
- قول يا بابا ماجد قول
- ما تخرس باه خلينى اعرف اكمل
- ................................
- كان مره جحا بيشتغل حطاب وراح الغابه جاب الخشب وراح يبيعه فى السوق وهو
راجع باه بالفلوس قابل ست عجوزه قالتله تشترى الفرخه دى يبنى منى؟
........... قالها لا مش عاوز ...........قالتله لا ساعدنى وخد الفرخه دى
منى بس متدبحهاش
- خخخخخخخخخخخخخخخخخخخخخخخخخخ
- انت بدأت تقسم ........امال بس عاملى خط الصعيد .............وسع كده لما اريح ساعتين انا كمان ................. وسع بأه متنحش